بھارت میں خاتون پر 9 سالہ بچے کے ساتھ زیادتی کا مقدمہ درج

بین الاقوامی
2 مہینے پہلے
Image

کیرالہ: بھارت میں 9 سالہ بچے کو زبردستی جنسی طور پر استعمال کرنے پر 36 سالہ خاتون کے خلاف مقدمہ درج کرلیا گیا۔

بین الاقوامی خبر رساں ادارے کے مطابق بھارتی ریاست کیرالہ میں پولیس نے ایک خاتون کے خلاف جنسی زیادتی کا مقدمہ درج کرلیا ہے۔ خاتون پر اپنے شوہر کے 9 سالہ بھتیجے کو ایک سال تک جنسی طور پر استعمال کرنے کا الزام ہے۔

متاثرہ بچے نے مقامی ڈاکٹرز کو جنسی زیادتی سے متعلق آگاہ کیا تھا جس پر ڈاکٹر نے چائلڈ پروٹیکشن ڈپارٹمنٹ کو آگاہ کیا جس کے بعد پولیس بھی متحرک ہوئی اور بچوں کو جنسی زیادتی سے بچاؤ کے قانون کی شق 5 اور 6 کے تحت مقدمہ درج کر لیا۔

پولیس کا کہنا ہے کہ متاثرہ بچہ خاتون کا سسرالی رشتہ دار بھی ہے اور ایک ہی محلے میں رہائش پذیر ہیں، دونوں گھرانوں کے درمیان جائیداد کی تقسیم پر بھی جھگڑا ہے، مقدمے کی تفتیش کے دوران اس پہلو کو بھی مدنظر رکھا جائے گا۔

پولیس نے متاثرہ بچے اور ڈاکٹر کا بیان قلم بند کرنے کے بعد تفتیش کا آغاز کردیا ہے تاہم خاتون کی گرفتاری عمل میں نہیں لائی گئی ہے، قبل ازیں ایسے ہی ایک مقدمے میں پولیس نے اہل خانہ کے درمیان صلح صفائی کروا کر معاملہ دبا دیا تھا۔